ܢܲܣܝܼܗܲܬ ܕܚܘܼܠܡܵܢܵܐ ܘܩܵܘܕܹ̈ܐ (Health advice and restrictions) – ܐܵܬܘܿܪܵܝܵܐ ܟܲܠܕܵܝܵܐ (Assyrian)

ܚܲܡܝܼܡܘܼܢ ܠܓܵܢܵܘܟ݂ܘܿܢ ܘܠܐ݉ܚܖܹ̈ܢܹܐ ܡ݂ܢ ܟܘܿܒ݂ܝܼܕ 19

ܟܘܿܒ݂ܝܼܕ 19 ܗܲܠܲܡ ܒܸܦܪܵܣܵܐ ܝܠܹܗ ܓܵܘ ܟܢܘܼܫܬܵܐ. ܗܲܠܲܡ ܡܵܨܹܐ ܕܥܵܒܹܕ ܚܲܕ݉ܟܡܵܐ ܐ݉ܢܵܫܹ̈ܐ ܪܲܒܵܐ ܡܖ̈ܝܼܥܹܐ. ܚܲܡܲܝܬܵܐ ܕܓܵܢܵܘܟ݂ܘܿܢ ܝܼܠܵܗ̇ ܗ̇ܝ ܐܘܼܪܚܵܐ ܒܘܼܫ ܨܦܵܝ ܩܵܐ ܚܲܡܲܝܬܵܐ ܕܐ݉ܚܖܹ̈ܢܹܐ. ܠܹܐ ܡܵܨܝܼܬܘܿܢ ܦܵܪܣܝܼܬܘܿܢ ܠܟܘܿܒ݂ܝܼܕ 19 ܐܸܢ ܠܵܐ ܝܬܘܿܢ ܛܸܦܝܹ̈ܐ ܒܟܘܿܒ݂ܝܼܕ 19.

ܥܒ݂ܘܿܕܘܼܢ ܨܲܚܨܲܝܬܵܐ

ܦܘܼܫܘܼܢ ܓܵܘ ܒܲܝܬܵܐ ܘܥܒ݂ܘܿܕܘܼܢ ܨܲܚܨܲܝܬܵܐ ܕܡܕܲܠܩܒ݂ܵܢܘܼܬܵܐ ܣܘܼܪܗܵܒ݂ܵܝܬܵܐ (RAT) ܐܸܢ:

• ܐܝܼܬܠܵܘܟ݂ܘܿܢ ܢܝܼܫܲܢܩܹ̈ܐ ܐܲܝܟ݂ ܨܠܵܝܬܵܐ ܕܢܲܚܝܼܪܵܐ، ܡܲܪܥܵܐ ܕܒܵܠܘܿܥܬܵܐ، ܫܥܵܠܬܵܐ، ܚܲܡܚܲܡܬܵܐ ܐܵܘ ܡܲܪܓܲܕܬܵܐ.
• ܝܼܬܘܿܢ ܚܲܕ݉ ܕܵܩܪܵܢܵܐ ܒܚܲܕ݉ ܦܪܨܘܿܦܵܐ ܛܸܦܝܵܐ ܒܟܘܿܒ݂ܝܼܕ 19.

ܐܸܢ ܦܠܵܛܵܐ ܕܨܲܚܨܲܝܬܵܘܟ݂ܘܿܢ ܝܼܠܹܗ ܡܪܝܼܡܵܢܵܐ، ܘܵܠܹܐ ܕܗܵܘܝܼܬܘܿܢ ܡܲܦܠܘܿܚܹܐ ܨܲܚܨܲܝܬܵܐ ܕܡܕܲܠܩܒ݂ܵܢܘܼܬܵܐ ܣܘܼܪܗܵܒ݂ܵܝܬܵܐ (RAT) ܩܵܐ ܚܲܕ݉ܟܡܵܐ ܝܵܘܡܵܢܹ̈ܐ ܡ݂ܢ ܒܵܬܲܪ ܗܵܕܵܟ݂ ܘܦܵܝܫܝܼܬܘܿܢ ܓܵܘ ܒܲܝܬܵܐ ܗܲܠ ܕܦܵܪܩܝܼ ܢܝܼܫܲܢ̈ܩܵܘܟ݂ܘܿܢ.

ܐܸܢ ܦܠܵܛܵܐ ܕܨܲܚܨܲܝܬܵܘܟ݂ܘܿܢ ܝܼܠܹܗ ܡܣܝܼܡܵܢܵܐ ܒܡܲܦܠܲܚܬܵܐ ܕܨܲܚܨܲܝܬܵܐ ܕܡܕܲܠܩܒ݂ܵܢܘܼܬܵܐ ܣܘܼܪܗܵܒ݂ܵܝܬܵܐ (RAT) ܘܵܠܹܐ ܕܬܲܫܪܸܪܝܼܬܘܿܢ ܠܦܠܵܛܵܐ ܕܨܲܚܨܲܝܬܵܘܟ݂ܘܿܢ ܩܵܐ ܡܦܲܪܢܣܵܢܘܼܬܵܐ ܕܚܘܼܠܡܵܢܵܐ. ܡܵܨܝܼܬܘܿܢ ܬܲܫܪܸܪܝܼܬܘܿܢ ܠܦܠܵܛܵܐ ܕܨܲܚܨܲܝܬܵܘܟ݂ܘܿܢ ܒܐܘܼܪܚܵܐ ܕܐܸܢܬܸܪܢܹܝܬ ܐܵܘ ܒܡܲܚܒܲܪܬܵܐ ܥܲܠ ܪܲܩܡܵܐ 398 675 1800. ܐܸܢ ܬܲܫܪܸܪܝܼܬܘܿܢ ܠܦܠܵܛܵܐ ܕܨܲܚܨܲܝܬܵܘܟ݂ܘܿܢ، ܡܵܨܝܼܬܘܿܢ ܩܲܒܠܝܼܬܘܿܢ ܝܲܨܝܼܦܘܼܬܵܐ ܐܵܣܝܵܝܬܵܐ ܘܕܲܖ̈ܡܵܢܹܐ ܕܟܘܿܒ݂ܝܼܕ ܡܲܓܵܢ.

ܒܲܩܪܘܼܢ ܡ݂ܢ ܚܲܕ݉ ܐܵܣܝܵܐ ܓܵܘܵܢܵܝܵܐ ܩܵܐ ܕܥܵܒ݂ܕܝܼܬܘܿܢ ܚܕܵܐ ܨܲܚܨܲܝܬܵܐ ܕ PCR ܐܸܢ ܗܘܹܐ ܠܵܘܟ݂ܘܿܢ ܪܲܒܵܐ ܡܖ̈ܝܼܥܹܐ ܒܟܘܿܒ݂ܝܼܕ 19. ܠܵܐ ܝܬܘܿܢ ܣܢܝܼܩܹ̈ܐ ܕܬܲܫܪܸܪܝܼܬܘܿܢ ܠܦܠܵܛܵܐ ܕܨܲܚܨܲܝܬܵܘܟ݂ܘܿܢ ܐܸܢ ܗܘܹܐܠܹܗ ܦܠܛܵܐ ܡܣܝܼܡܵܢܵܐ ܕܨܲܚܨܲܝܬܵܐ ܕ PCR.

ܡܲܫ̃ܟ݂ܚܘܼܢ ܡܵܘܕܥܵܢܘܼܬܵܐ ܒܘܼܫ ܙܵܘܕܵܐ ܥܲܠ ܥܒ݂ܘܿܕܘܼܢ ܨܲܚܨܲܝܬܵܐ ܕܟܘܿܒ݂ܝܼܕ 19.

ܡܲܣܝܼܡܘܼܢ ܒܵܠܵܐ ܥܲܠ ܚܘܼܠܡܵܢܵܘܟ݂ܘܿܢ

ܐܸܢ ܦܠܵܛܵܐ ܕܨܲܚܨܲܝܬܵܘܟ݂ܘܿܢ ܩܵܐ ܟܘܿܒ݂ܝܼܕ 19ܝܼܠܹܗ ܡܣܝܼܡܵܢܵܐ ܘܵܠܹܐ ܕܡܲܢܝܸܚܝܼܬܘܿܢ ܘܗܲܡܙܸܡܝܼܬܘܿܢ ܥܲܡ ܚܲܕ݉ ܐܵܣܝܵܐ ܓܵܘܵܢܵܝܵܐ. ܒܘܼܫܵܝܘܼܬܵܐ ܕܐ݉ܢܵܫܹ̈ܐ ܒܸܕ ܗܵܘܹܐ ܠܗ݉ܘܿܢ ܢܝܼܫܲܢܩܹ̈ܐ ܡܲܟܝܼܟ݂ܹ̈ܐ ܘܡܸܬܡܵܨܝܵܢܬܵܐ ܝܠܵܗ̇ ܕܒܵܣܡܝܼ ܓܵܘ ܒܲܝܬܵܐ. ܘܵܠܹܐ ܥܲܠܵܘܟ݂ܘܿܢ ܕ:

• ܦܵܝܫܝܼܬܘܿܢ ܓܵܘ ܒܲܝܬܵܐ ܠܵܐ ܒܵܨܘܿܪܵܐ ܡ݂ܢ 5 ܝܵܘܡܵܢܹ̈ܐ. ܠܵܐ ܐܵܙܠ݉ܝܼܬܘܿܢ ܠܦܘܼܠܚܵܢܵܐ ܐܵܘ ܠܡܲܕܪܲܫܬܵܐ. ܗܵܘܝܼܬܘܿܢ ܪܸܚܩܵܐ ܡ݂ܢ ܒܵܬܲܝ̈ ܟܖ̈ܝܼܗܹܐ، ܕܘܼܟܵܢܹ̈ܐ ܕܝܲܨܝܼܦܘܼܬܵܐ ܕܣܵܒܹ̈ܐ، ܘܚܸܠܡܲܬܹ̈ܐ ܕܡܥܵܘ̈ܟ݂ܘܼܬܵܐ.
• ܠܒ݂ܘܿܫܘܼܢ ܩܘܼܢܵܥܵܐ ܐܸܢ ܘܵܠܹܐ ܕܦܵܠܛܝܼܬܘܿܢ ܡ݂ܢ ܒܲܝܬܵܐ ܩܵܐ ܚܕܵܐ ܥܪܝܼܨܘܼܬܵܐ. ܩܘܼܢܵܥܹ̈ܐ ܒܘܼܫ ܨܦܵܝ ܝܼܢܵܐ ܨܵܖ̈ܘܿܝܹܐ ܐܵܘ N95.
• ܡܲܝܕܸܥܘܼܢ ܩܵܐ ܐ݉ܢܵܫܹ̈ܐ ܕܚܸܙܝܵܝܬܘܿܢ ܐܵܘ ܕܘܼܟܵܢܹ̈ܐ ܕܐ݉ܙܝܼܠܝܼܬܘܿܢ ܐܸܠܵܝܗܝ ܕܛܦܹܐ ܠܵܘܟ݂ܘܿܢ ܒܟܘܿܒ݂ܝܼܕ 19 ܒܥܸܕܵܢܵܐ ܩܘܼܪܒܵܐ.

ܐܸܢ ܢܝܼܫܲܢ̈ܩܵܘܟ݂ܘܿܢ ܦܵܝܫܝܼ ܒܘܼܫ ܚܸܪܒܵܐ، ܘܵܠܹܐ ܕܗܲܡܙܸܡܝܼܬܘܿܢ ܥܲܡ ܚܲܕ݉ ܐܵܣܝܵܐ ܓܵܘܵܢܵܝܵܐ ܐܵܘ ܡܲܚܒܸܪܝܼܬܘܿܢ ܩܵܐ ܚܲܕ݉ ܒܹܝܬ ܐܵܣܝܘܼܬܵܐ ܕܢܵܦܵܣ ܕܐܵܣܝܹ̈ܐ ܓܵܘܵܢܵܝܹ̈ܐ.

ܐܵܦ ܡܵܨܝܼܬܘܿܢ ܕܡܲܚܒܸܪܝܼܬܘܿܢ ܩܵܐ ܚܘܼܛܵܐ ܕܥܘܼܕܪܵܢܵܐ ܐܲܬܪܵܝܵܐ ܕܒ݂ܵܝܪܘܿܣ ܕܟܘܿܪܘܿܢܵܐ ܥܲܠ ܪܲܩܡܵܐ 1800 020 080.

ܡܲܚܒܸܪܘܼܢ ܩܵܐ ܡܦܲܪܢܣܵܢܘܼܬܵܐ ܕܥܪܝܼܨܘܼܬܵܐ ܒܐܘܼܪܚܵܐ ܕܐܸܢܬܸܪܢܹܝܬ ܩܵܐ ܝܲܨܝܼܦܘܼܬܵܐ ܥܪܝܼܨܵܝܬܵܐ ܐܸܢ ܠܵܐ ܡܵܨܝܼܬܘܿܢ ܗܲܡܙܸܡܝܼܬܘܿܢ ܥܲܡ ܚܲܕ݉ ܐܵܣܝܵܐ ܓܵܘܵܢܵܝܵܐ.

ܩܵܐ ܥܖ̈ܝܼܨܘܼܝܵܬܹܐ ܡܲܚܒܸܪܘܼܢ ܩܵܐ ܬܠܵܬܵܐ ܨܝܼܦܵܖܹ̈ܐ (000).

ܩܵܘܡܵܐ ܕܗܵܘܝܼܬܘܿܢ ܡܛܲܦܝܵܢܹ̈ܐ ܩܵܐ ܐ݉ܚܖܹ̈ܢܹܐ ܩܵܐ ܡܸܬܚܵܐ ܗܲܠ 10 ܝܵܘܡܵܢܹ̈ܐ. ܘܵܠܹܐ ܕܦܵܝܫܝܼܬܘܿܢ ܓܵܘ ܒܲܝܬܵܐ ܐܸܢ ܐܝܼܬܠܵܘܟ݂ܘܿܢ ܨܠܵܝܬܵܐ ܕܢܲܚܝܼܪܵܐ، ܡܲܪܥܵܐ ܕܒܵܠܘܿܥܬܵܐ، ܚܲܡܚܲܡܬܵܐ، ܡܲܪܓܲܕܬܵܐ، ܐܵܘ ܩܛܵܥܬܵܐ ܕܢܵܦܲܣ. ܡܲܦܠܸܚܘܼܢ ܚܕܵܐ ܨܲܚܨܲܝܬܵܐ ܕܡܕܲܠܩܒ݂ܵܢܘܼܬܵܐ ܣܘܼܪܗܵܒ݂ܵܝܬܵܐ ܐܵܘ ܗܲܡܙܼܡܘܼܢ ܥܲܡ ܚܲܕ݉ ܐܵܣܝܵܐ ܓܵܘܵܢܵܝܵܐ ܐܸܢ ܠܵܐ ܝܬܘܿܢ ܚܲܬܝܼܬܹ̈ܐ.

ܥܘܼܕܪܵܢܵܐ

ܩܵܐ ܡܵܘܕܥܵܢܘܼܬܵܐ ܒܘܼܫ ܙܵܘܕܵܐ:

• ܥܒ݂ܘܿܪܘܼܢ ܠܣܸܕܪܵܐ ܕܣܲܚܒܲܪܬܵܐ ܕܟܘܿܒ݂ܝܼܕ 19 ܩܵܐ ܡܵܐ ܕܥܵܒ݂ܕܝܼܬܘܿܢ ܐܸܢ ܦܠܵܛܵܐ ܕܨܲܚܨܲܝܬܵܘܟ݂ܘܿܢ ܕܟܘܼܒ݂ܝܼܕ ܗܘܹܐܠܹܗ ܡܣܝܼܡܵܢܵܐ.
• ܥܒ݂ܘܿܪܘܼܢ ܠܡܕܲܒܲܪܬܵܐ ܕܟܘܿܒ݂ܝܼܕ 19 ܩܵܐ ܢܝܼܫܲܢܩܹ̈ܐ ܘܡܲܣܝܲܡܬܵܐ ܕܒܵܠܵܐ ܥܲܠ ܚܘܼܠܡܵܢܵܘܟ݂ܘܿܢ ܓܵܘ ܒܲܝܬܵܐ.

ܩܵܐ ܗܲܡܙܲܡܬܵܐ ܥܲܡ ܚܲܕ݉ ܐ݉ܢܵܫܵܐ:

• ܡܲܚܒܸܪܝܘܼܢ ܩܵܐ ܚܘܼܛܵܐ ܕܥܘܼܕܪܵܢܵܐ ܐܲܬܪܵܝܵܐ ܕܒ݂ܵܝܪܘܿܣ ܕܟܘܿܪܘܿܢܵܐ ܥܲܠ ܪܲܩܡܵܐ 1800 020 080.
• ܡܲܚܒܸܪܘܼܢ ܩܵܐ ܚܸܠܡܲܬ ܕܬܲܪܓܲܡܬܵܐ ܥܲܠ ܪܲܩܡܵܐ ܕ 131 450

ܒܲܩܪܘܼܢ ܒܘܼܕ ܕܲܖ̈ܡܵܢܹܐ ܕܟܘܿܒ݂ܝܼܕ

ܕܲܖ̈ܡܵܢܹܐ ܕܟܘܿܒ݂ܝܼܕ ܟܹܐ ܚܲܡܝܼ ܠܚܲܝܹ̈ܐ ܘܡܲܟܠܝܼ ܐ݉ܢܵܫܹ̈ܐ ܡ݂ܢ ܡܲܪܥܵܐ ܚܲܝܠܵܢܵܐ ܕܟܘܿܒ݂ܝܼܕ 19. ܘܵܠܹܐ ܕܦܵܝܫܝܼ ܫܩܝܼܠܹܐ ܟܡܵܐ ܕܗܵܘܝܵܐ ܓ̰ܲܠܕܹܐ ܘܒܡܸܬܚܵܐ ܕ 5 ܝܵܘܡܵܢܹ̈ܐ ܡ݂ܢ ܛܦܵܝܬܵܐ ܒܡܲܪܥܵܐ ܩܵܐ ܕܦܵܠܚܝܼ ܒܘܼܫ ܨܦܵܝ.

ܓ̰ܲܘܸܒܘܼܢ ܠܐܲܢܹܐ ܒܘܼܩܵܖܹ̈ܐ ܩܵܐ ܕܝܵܕܥܝܼܬܘܿܢ ܐܸܢ ܚܫܝܼܚܹ̈ܐ ܝܬܘܿܢ ܠܕܲܖ̈ܡܵܢܹܐ ܕܟܘܿܒ݂ܝܼܕ. ܗܲܡܙܸܡܘܼܢ ܥܲܡ ܚܲܕ݉ ܐܵܣܝܵܐ ܓܵܘܵܢܵܝܵܐ ܐܸܢ ܝܼܬܘܿܢ ܚܫܝܼܚܹ̈ܐ. ܡܵܨܹܐ ܚܲܕ݉ ܐܵܣܝܵܐ ܓܵܘܵܢܵܝܵܐ ܡܥܲܕܸܪ ܩܵܐ ܕܗܵܘܹܐ ܚܲܬܝܼܬܵܐ ܕܐ݉ܢܵܫܹܐ ܚܫܝܼܚܹ̈ܐ ܕܩܲܒܠܝܼ ܕܲܪܡܲܢܬܵܐ ܒܓ̰ܲܠܕܘܼܬܵܐ.

ܩܵܐ ܡܵܘܕܥܵܢܘܼܬܵܐ ܒܘܼܫ ܙܵܘܕܵܐ ܚܙܝܼܡܘܼܢ ܕܲܖ̈ܡܵܢܹܐ ܕܲܠܩܘܼܒ݂ܠ ܕܒ݂ܵܝܪܘܿܣ ܘܕܲܖ̈ܡܵܢܐ ܐ݉ܚܖܹ̈ܢܹܐ.

ܠܒ݂ܘܿܫܘܼܢ ܩܘܼܢܵܥܵܐ ܕܦܵܬܵܐ

ܩܘܼܢܵܥܹ̈ܐ ܟܹܐ ܡܵܨܝܼ ܕܡܲܟܠܝܼܠܵܘܟ݂ܘܿܢ ܡ݂ܢ ܛܦܵܝܬܵܐ ܘܦܪܵܣܬܵܐ ܕܟܘܿܒ݂ܝܼܕ 19. ܩܘܼܢܵܥܹ̈ܐ ܘܵܠܹܐ ܕܗܵܘܝܼ ܒܫܵܘܝܘܼܬܵܐ ܨܦܵܝ ܘܠܚܝܼܡܹ̈ܐ ܨܦܵܝ ܥܲܠ ܦܵܬܵܐ. ܩܘܼܢܵܥܹ̈ܐ (ܡܢܲܫܡܵܢܹ̈ܐ) ܕ N95 ܘ P2 ܟܹܐ ܝܵܗܒ݂ܝܼ ܚܲܡܲܝܬܵܐ ܒܘܼܫ ܨܦܵܝ.

ܘܵܠܹܐ ܕܠܵܒ݂ܫܝܼܬܘܿܢ ܚܲܕ݉ ܩܘܼܢܵܥܵܐ:

• ܓܵܘ ܢܘܼܩܵܠܹ̈ܐ ܥܲܡܵܝܹ̈ܐ، ܒܚܕܵܐ ܕܘܼܟܬܵܐ ܥܲܡܵܝܬܵܐ، ܘܠܒܲܕܲܪ ܓܵܘ ܚܕܵܐ ܕܘܼܟܬܵܐ ܕܪܲܒܵܐ ܐ݉ܢܵܫܹ̈ܐ.
• ܐܸܢ ܐܝܼܬܠܵܘܟ݂ܘܿܢ ܟܘܿܒ݂ܝܼܕ 19 ܘܘܵܠܹܐ ܕܦܵܠܛܝܼܬܘܿܢ ܡ݂ܢ ܒܲܝܬܵܐ
• ܐܸܢ ܝܼܬܘܿܢ ܐܵܘ ܚܲܕ݉ ܐ݉ܢܵܫܵܐ ܓܵܘ ܩܸܢܛܵܐ ܕܡܵܪܥܝܼܬܘܿܢ ܪܲܒܵܐ.

ܫܲܒ݂ܖܹ̈ܐ ܒܥܘܼܡܪܵܐ ܕ 2 ܫܸܢܹ̈ܐ ܐܵܘ ܒܘܼܫ ܙܥܘܿܖܹ̈ܐ ܘܵܠܹܐ ܕܠܵܐ ܠܵܒ݂ܫܝܼ ܩܘܼܢܵܥܵܐ ܕܦܵܬܵܐ ܣܵܒܲܒ ܕܐܵܢܝܼ ܝܼܢܵܐ ܚܲܕ݉ ܩܸܢܛܵܐ ܕܚܢܵܩܬܵܐ ܩܵܐ ܠܵܝܗܝ.

ܩܵܐ ܡܵܘܕܥܵܢܘܼܬܵܐ ܒܘܼܫ ܙܵܘܕܵܐ ܚܙܝܼܡܘܼܢ ܩܘܼܢܵܥܹ̈ܐ ܕܦܵܬܵܐ.

ܫܩܘܿܠܘܼܢ ܣܸܪܦܵܘܟ݂ܘܿܢ ܕܛܲܥܲܡܬܵܐ ܕܒܵܬܲܪ ܡܸܢܹܗ

ܛܘܼܥܵܡܹ̈ܐ ܝܼܢܵܐ ܗ̇ܝ ܐܘܼܪܚܵܐ ܒܘܼܫ ܨܦܵܝ ܩܵܐ ܚܲܡܲܝܬܵܐ ܕܓܵܢܵܘܟ݂ܘܿܢ ܘܒܲܝܬܘܼܬܵܘܟ݂ܘܿܢ ܡ݂ܢ ܕܗܵܘܝܼܬܘܿܢ ܪܲܒܵܐ ܡܖ̈ܝܼܥܹܐ ܒܟܘܿܒ݂ܝܼܕ 19. ܘܵܠܹܐ ܕܗܵܘܝܵܐ ܡܵܘܕܥܵܢܘܼܬܵܘܟ݂ܘܿܢ ܡܚܘܿܕܸܕܬܵܐ ܒܘܼܕ ܛܘܼܥܵܡܹ̈ܐ ܡܘܿܚܫܸܚܹ̈ܐ ܩܵܐ ܠܵܘܟ݂ܘܿܢ. ܗܲܡܙܸܡܘܼܢ ܥܲܡ ܚܲܕ݉ ܐܵܣܝܵܐ ܓܵܘܵܢܵܝܵܐ ܩܵܐ ܕܝܵܕܥܝܼܬܘܿܢ ܟܡܵܐ ܣܸܖ̈ܦܹܐ ܝܼܢܵܐ ܡܘܿܚܫܸܚܹ̈ܐ ܩܵܐ ܠܵܘܟ݂ܘܿܢ.

ܗܲܠܲܡ ܘܵܠܹܐ ܕܦܵܝܫܝܼܬܘܿܢ ܡܛܘܿܥܡܹ̈ܐ ܐܸܢ ܗܘܸܝܹ̈ܐ ܝܬܘܿܢ ܛܸܦܝܹ̈ܐ ܒܟܘܿܒ݂ܝܼܕ 19. ܡܲܦܠܸܚܘܼܢ ܡܲܫ̃ܟ݂ܚܵܢܵܐ ܕܒܹܝܬ ܐܵܣܝܘܼܬܵܐ ܕܛܘܼܥܵܡܵܐ ܩܵܐ ܫܵܩܠܝܼܬܘܿܢ ܡܵܘܥܕܵܐ ܕܣܸܪܦܵܘܟ݂ܘܿܢ ܕܒܹܐܬܵܝܵܐ ܝܠܹܗ ܥܲܡ ܚܲܕ݉ ܐܵܣܝܵܐ ܓܵܘܵܢܵܝܵܐ ܐܵܘ ܨܲܝܕܵܠܝܼܬܵܐ ܡܲܗܲܠܵܝܬܵܐ.

ܩܵܐ ܡܵܘܕܥܵܢܘܼܬܵܐ ܒܘܼܫ ܙܵܘܕܵܐ ܚܙܝܼܡܘܼܢ ܛܘܼܥܵܡܵܐ ܕܟܘܿܒ݂ܝܼܕ 19.

ܫܒ݂ܘܿܩܘܼܢ ܠܗܵܘܵܐ ܨܸܦܝܵܐ ܩܵܐ ܕܥܵܒܹܪ

ܟܘܿܒ݂ܝܼܕ 19 ܟܹܐ ܦܵܪܹܣ ܓܵܘ ܗܵܘܵܐ. ܡܲܥܒܲܪܬܵܐ ܕܗܵܘܵܐ ܨܸܦܝܵܐ ܓܵܘ ܕܘܼܟܬܵܐ ܕܒ݂ܝܼܪܬܵܐ ܡܵܨܹܝܵܐ ܕܡܲܒܨܸܪܵܐ ܠܩܸܢܛܵܐ ܕܦܪܵܣܬܵܐ ܕܟܘܿܒ݂ܝܼܕ 19. ܦܬܘܿܚܘܼܢ ܠܟܵܘܵܬܹ̈ܐ ܐܵܘ ܠܬܲܖ̈ܥܵܢܹܐ ܐܸܢ ܡܸܬܡܵܨܝܵܢܬܵܐ ܝܠܵܗ̇ ܐܝܼܡܲܢ ܕܓ̰ܵܡܥܝܼܬܘܿܢ ܠܓܵܘܵܝܹܐ ܥܲܡ ܐ݉ܢܵܫܹ̈ܐ ܐ݉ܚܖܹ̈ܢܹܐ. ܐܸܢ ܠܹܐ ܡܵܨܝܼܬܘܿܢ، ܡܸܬܗܵܘܝܵܢܬܵܐ ܝܠܵܗ̇ ܕܡܲܦܠܸܚܝܼܬܘܿܢ ܡܕܲܟ݂ܵܝܵܢܵܐ ܕܗܵܘܵܐ (HEPA filter) ܕܟܹܐ ܡܵܘܒܸܠ ܠܦܸܖ̈ܬܘܼܟ݂ܹܐ ܗܵܘܵܝܹ̈ܐ ܡ݂ܢ ܗܵܘܵܐ.

ܩܵܐ ܡܵܘܕܥܵܢܘܼܬܵܐ ܒܘܼܫ ܙܵܘܕܵܐ ܚܙܝܼܡܘܼܢ ܠܡܨܲܦܲܝܬܵܐ ܕܗܵܘܵܐ.

ܒܣܵܡܬܵܐ ܡ݂ܢ ܟܘܿܒ݂ܝܼܕ 19

ܪܲܒܵܐ ܐ݉ܢܵܫܹ̈ܐ ܒܸܕ ܪܵܓ݂ܫܝܼ ܡܖ̈ܝܼܥܹܐ ܡ݂ܢ ܟܘܿܒ݂ܝܼܕ 19 ܒܵܬܲܪ ܕܠܵܐ ܝܢܵܐ ܐ݉ܚܪܹܢܵܐ ܡܛܲܦܝܵܢܹ̈ܐ. ܫܒ݂ܘܿܩܘܼܢ ܩܵܐ ܦܲܓ݂ܪܵܘܟ݂ܘܿܢ ܝܲܨܝܼܦܘܼܬܵܐ ܘܥܸܕܵܢܵܐ ܩܵܐ ܕܒܵܣܹܡ ܒܐܘܼܪܚܵܐ ܬܪܝܼܨܬܵܐ.

ܘܵܠܹܐ ܕܣܵܒܪܝܼܬܘܿܢ ܩܵܐ ܡܸܬܚܵܐ ܕ 3 ܝܲܖ̈ܚܹܐ ܒܵܬܲܪ ܛܦܵܝܬܵܘܟ݂ܘܿܢ ܒܡܲܪܥܵܐ، ܘܩܲܕ݉ܡ ܕܫܵܩܠܝܼܬܘܿܢ ܛܘܼܥܵܡܵܘܟ݂ܘܿܢ ܕܒܹܐܬܵܝܵܐ ܝܠܹܗ. ܐܵܗܵܐ ܒܸܕ ܥܵܒ݂ܕܵܐ ܠܵܘܟ݂ܘܿܢ ܚܲܬܝܼܬܹ̈ܐ ܕܫܵܩܠܝܼܬܘܿܢ ܚܲܡܲܝܬܵܐ ܒܘܼܫ ܨܦܵܝ ܕܲܠܩܘܼܒ݂ܠ ܕܡܲܪܥܵܐ.

ܡܸܬܡܵܨܝܵܢܬܵܐ ܝܠܵܗ̇ ܕܛܵܦܝܼܬܘܿܢ ܒܟܘܿܒ݂ܝܼܕ 19 ܚܕܵܐ ܓܵܗܵܐ ܐ݉ܚܪܹܬܵܐ ܟܡܵܐ ܓ̰ܲܠܕܹܐ ܐܲܝܟ݂ 4 ܫܵܒ݂ܘܿܥܹ̈ܐ ܒܵܬܲܪ ܒܣܵܡܬܵܘܟ݂ܘܿܢ. ܐܸܢ ܐܝܼܬܠܵܘܟ݂ܘܿܢ ܢܝܼܫܲܢܩܹ̈ܐ ܩܵܐ ܡܸܬܚܵܐ ܕ 4 ܫܵܒ݂ܘܿܥܹ̈ܐ ܐܵܘ ܙܵܘܕܵܐ ܡ݂ܢ ܒܵܬܲܪ ܛܦܵܝܬܵܘܟ݂ܘܿܢ، ܘܵܠܹܐ ܕܥܵܒ݂ܕܝܼܬܘܿܢ ܨܲܚܨܲܝܬܵܐ.

ܟܘܿܒ݂ܝܼܕ 19 ܝܲܪܝܼܟ݂ܵܐ ܝܼܠܹܗ ܐܝܼܡܲܢ ܕܢܝܼܫܲܢܩܹ̈ܐ ܕܟܘܿܒ݂ܝܼܕ 19 ܟܹܐ ܦܵܝܫܝܼ ܩܵܐ ܙܵܘܕܵܐ ܡ݂ܢ 3 ܝܲܖ̈ܚܹܐ. ܘܵܠܹܐ ܕܚܵܙܝܼܬܘܿܢ ܐܵܣܝܵܘܟ݂ܘܿܢ ܓܵܘܵܢܵܝܵܐ ܕܗ̇ܘ ܡܵܨܹܐ ܡܥܲܕܸܪܠܵܘܟ݂ܘܿܢ ܒܡܕܲܒܲܪܬܵܐ ܕܢܝܼܫܲܢ̈ܩܵܘܟ݂ܘܿܢ ܐܵܘ ܡܫܲܕܲܪܬܵܘܟ݂ܘܿܢ ܠܚܲܕ݉ ܡܸܬܕܝܼܠܵܢܵܐ ܐܸܢ ܐܵܗܵܐ ܛܠܝܼܒܬܵܐ ܝܠܵܗ̇.

ܡܲܫ̃ܟ݂ܚܘܼܢ ܡܵܘܕܥܵܢܘܼܬܵܐ ܒܘܼܫ ܙܵܘܕܵܐ ܥܲܠ ܟܘܿܒ݂ܝܼܕ ܝܲܪܝܼܟ݂ܵܐ.

ܐܸܢ ܝܼܬܘܿܢ ܕܵܩܖ̈ܵܢܹܐ ܒܐ݉ܚܖܹ̈ܢܹܐ

ܝܼܬܘܿܢ ܓܵܘ ܩܸܢܛܵܐ ܕܡܛܲܘܲܪܬܵܐ ܕܟܘܿܒ݂ܝܼܕ 19 ܐܸܢ ܫܲܪܸܟܝܼܬܘܿܢ ܚܲܕ݉ ܒܲܝܬܵܐ ܥܲܡ ܐ݉ܚܖܹ̈ܢܹܐ ܐܵܘ ܩܲܡ ܗܵܘܝܼ ܕܵܩܖ̈ܵܢܹܐ ܒܸܝܵܘܟ݂ܘܿܢ ܕܦܠܵܛܵܐ ܕܨܲܚܨܲܝܬܵܝܗܝ ܝܼܠܹܗ ܡܣܝܼܡܵܢܵܐ.

ܘܵܠܹܐ ܕܡܲܪܗܝܼܬܘܿܢ ܥܲܝܢܵܐ ܥܲܠ ܢܝܼܫܲܢ̈ܩܵܘܟ݂ܘܿܢ ܘܨܲܚܨܝܼܬܘܿܢ ܗܲܡܵܫܵܐ ܩܵܐ ܡܸܬܚܵܐ ܕ 7 ܝܵܘܡܵܢܹ̈ܐ ܒܵܬܲܪ ܕܩܵܪܬܵܘܟ݂ܘܿܢ ܒܚܲܕ݉ ܕܐܝܼܬܠܹܗ ܦܠܵܛܵܐ ܡܣܝܼܡܵܢܵܐ ܕܨܲܚܨܲܝܬܵܐ. ܒܡܸܬܚܵܐ ܕܐܵܗܵܐ ܥܸܕܵܢܵܐ، ܡܘܿܚܫܸܚܬܵܐ ܝܠܵܗ̇ ܩܵܐ ܠܵܘܟ݂ܘܿܢ ܕ:

• ܪܵܚܩܝܼܬܘܿܢ ܡ݂ܢ ܒܵܬܲܝ̈ ܟܖ̈ܝܼܗܹܐ، ܐܵܘܵܢܹ̈ܐ ܕܝܲܨܝܼܦܘܼܬܵܐ ܕܣܵܒܹ̈ܐ، ܘܚܸܠܡܲܬܹ̈ܐ ܕܡܥܵܘܟ݂ܘܼܬܵܐ
• ܠܵܒ݂ܫܝܼܬܘܿܢ ܚܲܕ݉ ܩܘܼܢܵܥܵܐ ܐܝܼܡܲܢ ܕܦܵܠܛܝܼܬܘܿܢ ܡ݂ܢ ܒܲܝܬܵܐ، ܒܸܚܒ݂ܵܫܵܐ ܓܵܘ ܢܘܼܩܵܠܵܐ ܥܲܡܵܝܵܐ ܘܕܘܼܟܵܢܹ̈ܐ ܓܵܘܵܝܹ̈ܐ ܐܲܝܟ݂ ܦܘܼܠܚܵܢܵܐ ܘܡܲܕܪܲܫܬܵܐ
• ܫܒ݂ܘܿܩܘܿܢ ܠܗܵܘܵܐ ܨܸܦܝܵܐ ܕܥܵܒܹܪ ܓܵܘ ܕܘܼܟܵܢܹ̈ܐ ܓܵܘܵܝܹ̈ܐ ܒܦܬܵܚܬܵܐ ܕܟܵܘܵܬܹ̈ܐ، ܐܝܼܡܲܢ ܕܡܸܬܡܵܨܝܵܢܬܵܐ ܝܠܵܗ̇

ܩܵܐ ܡܵܘܕܥܵܢܘܼܬܵܐ ܒܘܼܫ ܙܵܘܕܵܐ ܚܙܝܼܡܘܼܢ ܣܸܕܪܵܐ ܕܣܲܚܒܲܪܬܵܐ ܩܵܐ ܕܵܩܖ̈ܵܢܹܐ.