Huhu maluʻi KŌVITI-19 (COVID-19 vaccine) - Fakatonga (Tongan)

ʻUhinga ʻoku totonu ai ke ke huhu maluʻí

Ko e ngaahi huhu maluʻí ʻoku malu pea ʻaonga ʻi hono maluʻi ʻa e kakaí mei he puke lahi ʻi he KŌVITI-19. ʻOku mahuʻinga kiate koe ke tulituli ki he fakamuimuitaha ʻo e ngaahi huhu maluʻí ke fakapapauʻi ʻokú ke maʻu ʻa e lahi taha ʻo e maluʻi ke fakafepakiʻi ʻaki ʻa e vailasí. Ki he kakai ko ia ʻoku ʻatā ki aí, ʻoku ʻuhinga ʻa e fakamuimuitahá kuó ke ʻosi fakahoko ʻa e ngaahi fuofua takai ʻo e ngaahi huhu maluʻi COVID-19 pea pehē ki ha huhu fakalahi kuo fakahā atu.

Founga hono maʻu ʻa e huhu maluʻí

ʻOku ʻatā ke ngāueʻaki ʻa e ngaahi huhu maluʻí ʻi hoʻo fale talavai fakafeituʻú pe ko e GP.

ʻOku tonu ke ke talanoa ki ha toketā kapau ʻoku ʻi ai hao mahaki tauhi ki muʻa pe ʻikai ke ke pauʻia pe koe tousi ʻe fiha ʻokú ke fiemaʻú.

Ko e ngaahi huhu maluʻí ʻoku taʻetotongi, pea ʻoku ʻikai fiemaʻu haʻo kaati Metikea ka ke toki lava ʻo huhu maluʻi.

Ko hai ʻe lava ke huhu maluʻí

Ko e tokotaha kotoa pē kuo ʻosi taʻu 5 pe lahi hake ʻoku nau ʻatā ke huhu maluʻi. ʻOku malava ke huhu maluʻi foki ʻa e longaʻi fānau ʻe niʻihi ʻa ia ʻoku ʻatā ke huhu maluʻí ʻi he vahaʻa taʻu ko e māhina ʻe 6 pea siʻi hifo ʻi he taʻu 5.

Ko e tousi huhu maluʻi fakalahí ʻoku ʻatā ia maʻá e taha kotoa ʻoku taʻu 18 pe lahi hake, pea ʻoku mātuʻaki fokotuʻu atu ia maʻá e:

• kakai ʻoku taʻu 65 pe lahi hake
• kakai ʻoku taʻu 18 pe lahi hake ʻokú nau moʻua ʻi ha faʻahinga faingataʻaʻia fakaesino pe ko ha faʻahinga fokoutua faingataʻa

Ko ha huhu maluʻi paivaleni foʻoú ʻoku fakataumuʻa ki he ngaahi kalasi Omicron ʻoku ʻatā ia ke ngāueʻaki ʻi he fōtunga ʻo e tousi huhu fakalahi.

ʻE lava ke ke maʻu hoʻo tousi huhu fakalahí ʻi ha māhina ʻe 6 hili hoʻo tousi COVID fakamuimuí pe mei he ʻaho hono maʻu koé.

Talanoa ki ha toketā ki he lahi ʻo e ngaahi tousi pea mo e kalasi faitoʻo huhu maluʻi ʻe feʻunga mo koe mo hoʻo kiʻi tamá. Ki ha fakamatala lahiange, ʻaʻahi ki he Fai ho huhu maluʻí.

Hili ho huhu maluʻí

Te ke ala maʻu ha faʻahinga uesia makehe ʻo hangē ko ha mamahi ʻa e feituʻu naʻe huhu ai koé, tāvaivaia, felangaaki e uouá, mofi pe fakamomoko pe langa e hokotanga huí. Ko e ngaahi uesia makehé ʻoku anga maheni pē ia pea koe fakaʻilonga ia ʻoku ʻaonga ʻa e huhu maluʻí. ʻOku meimei tō maʻamaʻa pē pea mole atu pe hili ha ʻaho ʻe taha pe ua.

Ko e ngaahi uesia makehe fakatuʻutāmakí ʻoku tātaaitaha pē. Fetuʻutaki ki hoʻo toketaá kapau ʻokú ke hohaʻa, pe ʻoku ʻikai ke mōlea atu hoʻo ongoʻi ha uesia makehe hili ha ngaahi ʻaho siʻi.

Fekauʻaki mo e ngaahi huhu maluʻi KŌVITI-19

Ko e ngaahi huhu maluʻi kotoa kuo pau ke nau maʻu ʻa e ngaahi tuʻunga malu pau ʻaupito ʻa ia kuo ʻosi fokotuʻu ʻe he Australia Therapeutic Goods Administration kimuʻa pea toki fakaʻaongaʻi ʻi ʻAositelēlia. ʻOku fai leva honau huhú ʻe ha kau ʻōfisa moʻui ʻosi kualifai.

ʻI ʻAositelēlia, ʻoku ʻi ai ʻa e kalasi huhu maluʻi ʻe 3 ʻoku ʻatā pea kuo tali ke ngāue ʻaki:

• Faisa (Pfizer)
• Mōtena (Moderna)
• Novaveki (Novavax)

ʻOku lava ʻa e kakaí ke nau maʻu e ngaahi faitoʻo huhu maluʻi kehekehe ʻo fakatatau ki honau ngaahi taʻu motuʻá pea mo e ngaahi tuʻunga fakafaitoʻo honau sinó. Talanoa ki ha Toketā ke maʻu pe ko fē ʻa e faitoʻo huhu maluʻi ʻoku feʻunga mo koé.

Fakamatala lahiange

Puka leva hoʻo huhu tousi hokó ki hoʻo GP pe ko ha fale talavai fakafeituʻu ʻo ngāueʻaki ʻa e Health Direct Service Finder. Ki ha fakamatala lahiange, telefoni ki he Laine Tokoni ʻa e Kolonavailasi Fakapuleʻangá ʻi he1800 020 080.